PRISMA ta nifica na Hulandes: 'PRo-actieve Interdisciplinaire Self MAnagement educatie', esta Educacion tocante Maneho Propio cu ta Pro-activo y Interdisciplinario. Pro-activo pasobra bo ta participa activamente. Interdisciplinario pasobra diferente dunado di cuido ta traha hunto pa duna e curso aki. Y Maneho Propio kiermen cu nos kier duna bo e conocemento y habilidad necesario pa bo mes scoge con pa anda cu diabetes. Tambe con bo mes por influencia e factornan di riesgo pa asina preveni otro complicacionnan di salud riba termino largo.

PRISMA ta un programa diseña door di Amsterdam UMC basa riba e filosofia di e programa Ingles DESMOND, cual ta wordo ofreci rond mundo pa yuda esnan cu diabetes tipo 2 tuma maneho di nan salud.

PRISMA Aruba a wordo desaroya door di Fundacion Diabetes Aruba den colaboracion cu Amsterdam UMC y ta wordo sosteni door di Departamento di Salud Publico (DVG) y Pan American Health Organization (PAHO).

PRISMA ta pa cada persona diagnostica cu Diabetes tipo 2, cu ta motiva pa tuma control di e malesa door di influencia e factornan di riesgo y preveni otro complicacionnan di salud.

PRISMA ta pa e persona recien diagnostica te cu e persona cu ta biba cu diabetes pa algun aña of asta algun decada.

Pa registra pa un curso di PRISMA click aki of tuma contacto cu bo dokter (di cas), enfermera diabetico, “praktijkondersteuner” of otro dunador di cuido y yena e formulario di registracion.

PRISMA ta wordo duna den grupo chikito di mas o menos 10 persona cu nan pareha of miembro di famia, den un ambiente trankil y amabel. Den grupo chikito bo ta sinti bo mas comodo y ta placentero pa topa cu hende cu tambe ta purba maneha nan diabetes. Bo por siña di otro, yuda otro y comparti idea den e encuentronan.

Un curso ta consist di 3 dia di 3 ora cada biaha, cu un siman di interval entre cada dia di curso.
Contenido di cada dia ta consisti di actividadnan den grupo y individual unda bo ta wordo invita pa pensa y dialoga activamente. Pa asina bo ta miho prepara pa tuma decision pa un bon cuido di bo propio salud.

Durante PRISMA bo ta:

• Ricibi contesta riba bo preguntanan,
• Haya mas conocemento y abilidad practico,
• Wordo stimula y apoya pa haci decision mas saludabel cu ta yuda baha e riesgo pa malesa di curason y ader,
• Papia di bo preocupacionnan y busca diferente manera pa haya yudansa cu bo diabetes.

E encuentronan ta wordo guia pa 2 dunado di cuido den e ramo di diabetes cu ta specialisa den duna curso segun e filosofia di PRISMA. E dunado di cuido por ta un enfermera diabetico, dietista, fisioterapista, boticario, “praktijkondersteuner” y/of un dokter (di cas). E dunadonan di cuido aki t’ey pa yuda bo, pa amplia bo conocemento y mustra bo e opcionnan pa keda saludabel.

PRISMA ta completamente gratis y ta inclui:

• 3 dia di curso interactivo
• Mas conocemento, habilidad y inspiracion pa tuma control di bo salud
• Un ambiente trankil y amabel pa comparti experiencia y siña di otro
• Guia di dos profesional di salud
• Map cu informacion y tools addicional
• Plan di accion personal
• Participation gratis di un partner of miembro di famia como sosten
• Certificado di participation